Euskal kultur sorkuntzaren transmisioa sendotzea helburu
“Euskal Kultur Sorkuntzaren Transmisioa. Sormenean hezi, kulturan bizi” jardunaldia antolatu dugu bigarren aldiz elkarlanean Ahotseneak, Oinherrik, Bertsozale Elkarteak, Azpeitiko Udalak eta UEUk. Topagune honek egungo kultur bitartekaritza hartuko du hizpide, euskal kultur sorkuntzaren transmisioa egituratzea eta sendotzea helburu duelarik. Oraingoan eskolaz kanpoko transmisioan jarriko dugu arreta Senpere, Laudio, Lesaka eta Azpeitian egingo dituzten topaketetan. Izena emateko epea zabalik dago: www.ueu.eus
2019ko urrian ehun lagunetik gora bildu ginen Azpeitin ‘Sormenean Hezi, Kulturan bizi’ I. jardunaldian. Jardunaldiok antolatzeko abiapuntua argia zen: euskal kulturgintzaren transmisioan (ezagutzan eta praktikan) etena eman da. Ondorioz euskal kulturgintzaren transmisioa ez dago bermatuta hezkuntza arautuan, hezkuntza ez-arautuan eta familia edo etxe giroan. Azpeitiko jardunaldiak hezkuntza arautuan euskal kulturgintzaren transmisioaren egoeraren erradiografia egin eta Euskal Herri osoan elkarrekin aritzeko prest leudekeen eragileak identifikatzeko antolatu genituen. Jardunaldi haietatik sortu zen gaur egun lanean ari den Euskal Herri osorako ikuspegia duen lan-talde bat.
Aurtengo jardunaldietan hezkuntza araututik kanpo euskal kulturgintzaren transmisioaren (ezagutza eta praktika) egungo egoera esperientzia praktikoetatik ezagutu nahi dugu. Oinherritik argi baitaukagu hezkuntzaren ardura partekatua dela, eta balioen hezkuntzan eremu ez formalak duen garrantzia azpimarratu beharra dagoela.
Lau jardunaldi antolatu ditugu, egunerokoan eremu ez formal horretan gorpuzten diren esperientzia praktiko hori bidez, marko teoriko bat proposatu nahi genuke, zeina honako bi galderak hausnartuta osatu asmo dugun: Nola euskaltzaletzen gara? Nola kulturzaletzen gara? Nola sozializatzen gara euskarazko kultur sormenaren inguruan? Zein espazio ditugu euskarazko kultur sormenaren inguruan elkartzeko? Zer egin genezake elkarrekin euskal kulturgintzaren ekosistema osatzen dugun Euska Herri osoko eragileok?
Bestetik, jardunaldiotatik Euskal Herri osorako ikuspegia duen lan-talde bat osatu nahi dute erakunde antolatzaileek, zeinak euskal kulturgintzaren transmisioa (ezagutza eta praktika) eskolaz kanpo nola bermatu dezakegun aztertu eta proposatuko duen.
Lau jardunaldi antolatu ditugu, denak egitura antzekoarekin baina bakoitza burutuko den testuinguruan txertatua egongo da (klikatu bakoitzaren egitaraua ikusteko):
- 2021-10-23 - SENPERE (Larraldea)
- 2021-11-06 - LAUDIO (Aiaraldea Ekintzen Faktoria)
- 2021-11-13 - LESAKA (Harriondoa)
- 2021-11-20 - AZPEITIA (Elikagunea)
Jardunaldiaren antolatzaileek aipatu dugu kulturgintza ekosistema bat dela, sortzaileek, antolatzaileek, komunikabideek, hezitzaileek eta zaleek osatzen dutena: “Ekosistemako eragileek guztiek batera jardun behar dugu. Elkarlanik gabe, ez kulturgintzak, ez euskalgintzak ez herrigintzak ez dute etorkizunik. Aterabideak elkar hartu eta artikulatzetik soilik etorriko dira ulertzen dugunez, elkarlanerako ateak zabalik daude”.
Matrikula zabalik dago: www.ueu.eus webgunean.
