Patio tradizionala ahaztu dute, jolas librea bermatzeko

Bergarako San Martin eskolako Lehen Hezkuntzako patioa berritu egin dute, orain arteko patioaren eredua aldatu eta umeek jolas libreaz gozatzea sustatzeko; guraso elkartetik abiatu zen ideia eta udalak babestu egin du, 48.230 euroko inbertsioa eginda.

 

Bergarako San Martin eskolako Lehen Hezkuntzako patioa berritu egin dute, orain arteko patioaren eredua aldatu eta umeek jolas libreaz gozatzea sustatzeko; guraso elkartetik abiatu zen ideia eta udalak babestu egin du, 48.230 euroko inbertsioa eginda.

Ikasturte berriaren hasierarekin, erabilgarri dago San Martin eskolako Lehen Hezkuntzako “patio inklusibo” berria. Eskolako zuzendaritzak, guraso elkarteak eta Udalak agerraldi bateratua egin dute asteon parke berritua erakusteko. Oporren osteko berritasuna izanik, hainbat eta hainbat dira arratsaldea bertan pasatzen duten ume bergararrak. Izan ere, eskolaz kanpoko orduetan, asteburuak barne, zabalik egoten da eremua. Tirolina, salto egiteko gunea, ziburuak eta elementu naturalez
osatutako bestelako jolas tokiak ditu patio berrituak.

Umeen inplikazio zuzena

Guraso elkartetik abiatu zen jolas parkea berritzeko ideia. “Bereziki futbola zen eskaintza eta ikasle asko geratzen ziren dinamikatik kanpo. Prozesuan umeek zuzenean hartu dute parte, ezin dugu ahaztu-eta eurendako parkea dela. Maketak egin dituzte, askotariko eskaerak… Tirolina gela guztietako eskaeretan agertzen zen, adibidez”, dio Amaia Velez de Mendizabalek. Guraso elkarteak eta zuzen-daritzak Udalera jo zuten, eskola barruan garatutako prozesuaren berri emateko; izan ere, “hainbat mugarri” izan ditu ekimenak: gurasoek eta irakasleek osatutako talde bat eratzea, Haur eta Lehen Hezkuntzako ikasleek eurek maketak eta planoak egitea; eskolako komunitateak auzolanean moldaketa batzuk egitea inguruko enpresa txiki batzuen laguntzarekin… Hori bai, inbertsio nagusia udan garatu dute: Lurkoi enpresari 48.230 euro ordaindu dizkio Udalak, BEZa barne. Eskolako zuzendari Joserra Lasa “oso pozik” dago emaitzarekin: “Ikustea besterik ez dago izaten ari den harrera. Guraso elkartetik heldu zitzaigun proposamena eta hasieratik ikusi genuen bideratu beharrekoa zela. Eskola inklusiboa nahi badugu patio inklusibo bat izatea komeni zaigu. Ireki berri dugu; ea behar den moduan mantentzen dugun”.

Jolas librea sustatzea

Patio berrirako prozesuan argi gelditu zen birformulazio bat gertatu behar zela. San Martin eskolako patioek orain arteko patio tradizionalen antolaketa dute, esparru nagusia futbolak eta saskibaloiak hartzen du. “Jolas librea, orain arteko patioen diseinu eta antolaketan bigarren maila batean gelditzen da, eta jolas libre hori da eskola komunitatetik eta Udaletik sustatu eta indartu nahi dena. Umeen sormen eta garapen prozesurako ezinbestekoa delako jolas librea. Umeek, irakasleek eta gurasoek beste modu bateko patio bat nahi dutela argi gera-tu zen prozesuan: jolas librerako sortutakoa, naturarekin harremana bermatzen duena, esperientzian oinarritutakoa”, dio Ekaitz Aranberri zinegotziak.

Iturria: Goiena.