HERRI BAT HEZKUNTZATIK ERAIKITZEN jardunaldia eta Errenteriako Udalari ongi etorri sarera

Atzoko eguna berezia izan zen guretzat, alde batetik Errenteriako Udala sarera batu delako eta bestetik Uztailaren 1ean, Errenterin "Herri bat hezkuntzatik eraikitzen" izenburupean burutuko dugun jardunaldia aurkeztu genuelako. Horren inguruko informazio guztia aurkituko duzu jarraian.

Oinherri herri hezitzaileen egitasmoa modu teoriko zein praktikoan garatzea helburu duen EH mailako kultura, aisia, euskara eta hezkuntza arloko 16 eragilek osatzen dugu. Herri hezitzaileen filosofia herrietan nola egikaritzen den lantzeko, herri hezitzaileen sarea sustatzen ari gara EH mailako 25 bat udalekin. Eta oso pozik gaude, gaurkoan Errenteriako Udalarekin sinatzen dugun hitzarmen honen bidez, Errenteria ere sare honetako partaide bihurtzen delako.

Pasa den urtean Durangon burutu genituen jardunaldietan, herri hezitzaileen sareko herri hauen erronkak jaso genituen. Ikasturte honetan erronka horietan aurrera pausoak emateko bide berriak urratzen ari gara, eta horretarako lau lan ildo zehaztu ditugu. Pasa den otsailean abiapuntu moduan eskola kirola eraldatzen jardunaldia burutu genuen eta ordutik kide ezberdinez osatutako foro iraunkor bat eratu da. Aurrerago gazteen parte hartzea eta espazioen eraldaketan sakonduko dugun arren, gaurko honetan bigarren mugarria aurkezteko bildu gara. “Herri bat hezkuntzatik eraikitzen” izenburupean antolatu dugun jardunaldia hain zuzen ere. Jardunaldi honen muina aniztasunaren aurrean estrategia isolatuetatik herri estrategia bateratuetara pasatzeko beharra azaleratzean datza. Hau aurrera eramateko zenbait bidelagun izan ditugu, horien artean, Errenteriako Udala.

Errenteriako Udalak urrats berri bat herri hezitzailearen bidean

Errenteriako Udalak urteak daramatza hezkuntza politika publikoak Udal jardunaren erdigunean kokatzeko ahaleginean. Horren adierazle da Udal Eskola Kontseiluaren jarduna, herriko derrigorrezko hezkuntzako zentroekin garatzen ari den “erantzukidetasunean sakonduz, hezkuntza komunitatea saretu” deritzon prozesua eta bide horretan burututako hezkuntzaren diagnostiko partekatua. Ekimen hauen helburu nagusia, herriko hezkuntzaren argazki partekatu batetik abiatuta, hezkuntza politika bateratuak diseinatu eta garatzea da.

Oinherrirekin dirulaguntza zuzena sinatzea beste urrats garrantzitsu bat da bide horretan, herri hezitzaileen baloreetan sakontzeko eta udal ezberdinekin saretuta jarduteko aukera eskainiko diolako lankidetza honek Errenteriako Udalari.

Izan ere, Errenteriako Udalak ulertzen du hezkuntza, familiatik eta eskolatik harago luzatzen dela eta ez dela haurtzaroan hasi eta haurtzaroan bukatzen den prozesua. Hitzarmen honekin egiteko modu parte-hartzaile horien ezagueran eta hedapenean sakontzen jarraitu nahi da eta denon ongizatea bermatuko duen herri hezitzaile bat eraikitzen jarraitu.

Zentzu horretan, interes handiz jasoko du uztailaren 1erako programatu den jardunaldia, hezkuntzaren inguruko gogoetak partekatzeko aukera eskainiko diena bertaratuko direnei zein Errenteriako herritarrei.

Herri bat eraikitzerako orduan ezinbesteko ardatza da hezkuntza. Gure kasuan, are gehiago esatera ausartuko ginateke, gureak ez diren hezkuntza sistemak baitauzkagu. Hori horrela, Oinherri herri hezitzaileak sustatzeko elkartetik gure ekarpentxoa egin nahiko genuke gai honetan. Herri hezitzaileen egitasmoak hezkuntza modu integralago batean ulertzeko eta, herriko hezkuntza komunitateak saretzeko aukera erreala eskaintzen dituelako.

Herri hezitzaileen filosofia oinarri izanik eraiki dezakegun herriko hezkuntza integral honek herri konpromisoa dakar halabeharrez, heziketa prozesuen erantzule izango den komunitatea saretzea eskatzen baitu, erabat integrala, transbertsala eta inklusiboa izanda. Tokian tokiko ezaugarrietara egokitua, gertukoa eta herriko askotariko eragile, elkarte, kolektibo, erakunde eta heziguneen lankidetzan oinarritua.

Norabide honetan, Oinherrin argi daukagu hezkuntzaren eskumenek deszentralizazio prozesu bat behar dutela. Eta Udalek gai honetan protagonismo handiagoa hartzen joan beharko luketela, tokian tokiko herri hezitzaileak sustatzeko, auzolanean behetik gorako eraikuntza prozesu anitz eta zabalak sustatzeko.

Oinherritik sustatzen ari garen herri hezitzaileen sareko herri guztietan behin eta berriz errepikatzen den kezketako bat hezkuntzarena da. Egun, oraindik ere gure herrietan dauzkagun hezkuntza formaleko sare ezberdinen arteko gatazkak gainditzeko beharra eta elkarrekin herri ikuspegia landuko duen hezkuntza proiektuak garatzeko gogo eta ilusioa nabarmenak dira. Behar honetatik sortzen da beraz “HERRI BAT HEZKUNTZATIK ERAIKITZEN” jardunaldia.

2021eko uztailaren 1ean Errenterian Oinherrik Euskal Herriko hezkuntza komunitateko eragile ezberdinak bildu nahi ditu egun osoko jardunaldi batean. Bertan, hezkuntza herri hezitzaileen ikuspegitik zer-nola ikusten dugun eta, hezkuntza ulertzeko modu honek herriko hezkuntza proiektu integralak garatzeko egin dezakeen ekarpena lantzea litzateke helburu nagusia.

Horretarako, ondoren ikus daitekeen egitaraua prestatu dugu:

9:30-10:00- Harrera

10:00-10:30 Hik Hasik 2017an plazaratu zuen hezkuntza proposamena eta (H)arian prozesuak emandakoen arteko gakoak azalduko dizkigu Nora Salbotxek.

10:30-11:30 Errenterian azken urteetan hezkuntza komunitatearekin burutu duten lanketa ezagutzera eman eta balioan jarri nahiko genuke jardunaldi hauetan, gainontzeko herriei ere gaia lantzeko helduleku batzuk eskaintzeko. Itziar Ostolaza Galdos

11:30-12:00 Atsedenaldia

12:00-13:00 Hezkuntzaren eskumena deszentralitzako beharraren inguruan sakontzeko Kataluniako VIC herriko arduradunak gonbidatuko ditugu beraien prozesua azal dezaten. Elisabet Franquesa I Roca eta Glòria Cunill Vilalta

13:00-13:30 Galderentzako tartea

13:30-15:30 Bazkaltzeko tartea

15:30-17:30 Ertz ezberdinetatik eragin eta eraiki mahaingurua/ partehartzaileak aste honetan iragarriko ditugu ADI SAREEI!

Azkenik jardunaldietan parte hartzeko izena eman beharko da jarraian aurki daitekeen loturan.  Herri hezitzaileen sareko kide diren herrietako herritarrek ez dute matrikularik ordaindu beharko (izen emate galdetegian zehazten dira zein herri dauden sarearen baitan), gainontzeko guztiek 35 euroko ordainketa burutu beharko dute. Izen ematea formalizatzeko klikatu hemen