Herri Herritzaileek euren esperientziak ezagutarazi dituzte Zestoako jardunaldian
Herri Hezitzaileek beraien esperientziak partekatzeko eta hausnarketarako tartea hartu zuten udaberrian, maiatzaren 21ean Zestoako herri eskolan egindako jardunaldietan. Herri mugimentuetako ordezkariak, udal ordezkariak, hezitzaile eta irakasleak... askotariko pertsonek hartu zuten parte ekitaldian. Zestoako alkate Josetxo Mendizabalek egin ziten harrera bertan bildutako 60 lagun ingururi, eta Amaia Etxabek, Oinherriko lehendakariak, jardunaldiak zergatik eta zertarako egin zituzten azaldu zuen.
Topaketei hasiera eman eta gaia kokatzeko, Lorea Agirre Oinherriko kideak elkartearen 7 oinarriak azaldu zituen, eta bereiziki haurren kulturaren izaeraz jabetzearen eta hori aintzat hartzearen garrantziaz jardun zuen. Ondoren, herri hezitzaileen dinamikan parte hartzen duten herrietako batzuk beraien lanaren berri eman zuten.
- Zestoa: Leire Otaegi, Nora Palmitano eta Joxeba Larrañagak herri hezitzaile gisa ematen ari diren lehen pausoak azaldu zituzten.
- Tertanga (Amurrio): Aiora Azagirre eta Aritz Lilik haurrekin egindako euskararen jolasgunea aurkeztu zuten.
- Dima: Maitane Iza eta Sendoa Mirandak haurren parte-hartzearekin egindako hainbat egitasmoren berri eman zuten.
- Elizondo: Nora Salbotx eta Laura Andresenak baratze-hezitzaileen proiektua azaldu zuten.
- Mañaria: Ismene Uriarte eta Ainara Areitiok haurrekin osaturiko aurrekontu parte-hartzaileen berri eman zuten.
- Gernika: Andrea Aiapek Astra Txiki kulturgune parte-hartzailea aurkeztu zuen.
- Usurbil: Jone Miner eta Alaitz Aizpuruak hiri-antolamendu orokorra egiteko prozesuan haurren eta gazteen parte-hartzea nolako izan zen azaldu zuten.
- Orio: Ruben Iglesiasek herri curriculumaren garapenean haurrek eta gazteek nola hartu zuten parte esplikatu zuen.
- Otxandio: Iratxe Axpe eta Oier Nafarretek “Herri-ola, haurrak eta gazteak parte hartzen” proiektua aurkeztu zuten.
- Baigorri: Leire Bidartek Baigorri herri hezitzaile gisa egiten ari den ibilbidea aurkeztu zuen.
Behin hamaiketako eta gero, jardunaldiko parte hartzaileek taldetxotan banatu ziren, haurnasketarako tarte bat hartu asmoz. Foro horretan, haurren parte-hartzea sustatzeko eragile bakoitzak zein behar dituen azaldu zuten, baita bide horretan Oinherrik zer eskaintzea espero duten ere. Jada Herri Hezitzaileen dinamilan parte hartzen ari diren herrietako ordezkariek elkarrekin hausnartu zuten, batetik, eta egitasmo hezitzaileetako kideek eta norbanakoek beste talde batean, bestetik.
