Mariantongo parke berria diseinatzeari ekin dio Zumaiako Haurren Kontseiluak

Aisialdiaren inguruko diagnostikoa egiten ari dira Kontseiluan, eta, besteak beste, Marianton kaleko parke berriaren ezaugarriak definituko dituzte.

Hiru eskoletako hamalau haurrek osatzen dute Zumaiako Haurren Kontseilua. 9 eta 11 urte bitartean dituzte, eta helburua da alkateari proposamenak eta aholkuak ematen dizkion organoa izatea. 2021eko irailean osatu zen kontseilua, eta otsailaren azken astean egin zuten hirugarren bilera.

Irailetik hona aisialdiaren inguruko diagnostikoa egiten aritu dira, bertan zehazten diren lan-ildoetatik abiatuta hurrengo urteetan Haurren Kontseiluan lantzeko.  Lehenengo saioan "aisialdia" hitza elkarrekin definitu zuten eta mapa kontzeptual bat sortu zuten. Bigarren saioan Zumaian aisialdiaren alorrean dauden indarguneak identifikatu zituzten: zer dauka Zumaiak edo zer dago Zumaian gustatzen zaiguna? Zer erabiltzen dugu? Eta zergatik gustatzen zaigu? Zer da horretan balioan jartzen duguna? Hurrengo saioan ariketa berdina egin zuten, baina begirada ahulguneetan jarrita. Ekainean berrekingo diote hausnarketa prozesu horri.

Otsaileko bileran Iñaki Ostolaza alkatearen bisita izan zuten, eta haurrei proposatu zien Mariantongo parke berriaren ezaugarriak beraiek zehaztea. Zumaiako Udalak 2022ko aurrekontuetan txertatu zuen Marianton parkea berritu eta estalpea egiteko beharrezko aurrekontua, eta gehien erabiliko dutenak haurrak izanik, haiek zehaztuko dituzte irizpideak, ondoren parke berriaren proiektua egiteko. Haurrek dagoeneko identifikatuta zuten Zumaian parke estaliak behar zirela, eta Zumaiako Udalak borondate hori izanda, Haurren Kontseiluko partaideek erronkari heldu zioten, eta dagoeneko hasi dira parkearen ezaugarrien eta jolas moten inguruan hausnartzen. Bi saio erabiliko dituzte parkea diseinatzeko. Horrez gain, Zumaiarekin lotutako haurren gomendioak entzun, eta haiek zituzten zalantzak argitzeko tartea eduki zuen alkateak.

Haurrak, gaur egungo herritar

2020an Oinherri egitasmora eta Haurren Hiria sarera batu zen Zumaia. Udalak "Herri hezitzailea" izateko konpromisoa hartu zuen lankidetza hitzarmen horiekin. Haurrentzako eta haurrekin sortutako herri bat izatea suposatzen du horrek, haurren kulturaren aitortzatik abiatuta. Gainera, halako sareetan parte hartzeak haurraren ikuskera berri bat dakar: haurra etorkizuneko herritar edo etorkizuneko pertsona heldu moduan ikusi beharrean, eskubidedun herritartzat aitortzen da.

Ikuspuntu horretatik sortutako herri batek herritar guztiontzako dakartza onurak. Izan ere, haurrak edo bazterretako bestelako pertsonak erdigunean jartzeak bestelako praktika eta egiteko moduak dakartza. Halaber, herri hezitzaile hori balio hezitzaile batzuen gainean landu nahi dute (berdintasuna, aniztasuna, partehartzea, euskara...). Haurren Kontseiluarekin, besteak beste, umeen partaidetza bultzatuko dituzten iniziatibak martxan jartzea da Udalaren asmoa, eta, haurrei ahotsa, protagonismoa, erabakitzeko ahalmena eta erantzukizuna ematea.